ബൈക്കില്‍ ഒപ്പം യാത്ര ചെയ്ത ബിരുദ വിദ്യാര്‍ഥിനിയെ മര്‍ദ്ദിച്ച കേസില്‍ യുവാവിനെ പെരുനാട് പൊലീസ് അറസ്റ്റ് ചെയ്തു. അടിച്ചിപ്പുഴ പാരൂര്‍ വിഷ്ണുലാല്‍ (22) ആണ് അറസ്റ്റിലായത്.
വ്യാഴാഴ്ച വൈകിട്ടാണ് സംഭവം. മണ്ണാരക്കുളഞ്ഞിയില്‍ നിന്നാണ് യുവതിയെ യുവാവ് ബൈക്കില്‍ കയറ്റിയത്. എന്നാല്‍ വടശേരിക്കരയില്‍ എത്തിയപ്പോള്‍ യുവതി ബൈക്ക് നിര്‍ത്താന്‍ പറഞ്ഞെങ്കിലും യുവാവ് ബൈക്ക് നിര്‍ത്താന്‍ തയ്യാറായില്ല.
തുടര്‍ന്ന് ചൊള്ളനാവയലിലേക്ക് പോകുന്ന റോഡിലാണ് ബൈക്ക് നിര്‍ത്തിയത്. പിന്നീട് ഉണ്ടായ വാക്കേറ്റത്തിനിടെ യുവാവ് യുവതിയെ മര്‍ദിക്കുകയായിരുന്നെന്ന് പോലീസ് അറിയിച്ചു. കോടതിയില്‍ ഹാജരാക്കിയ യുവാവിനെ റിമാന്‍ഡ് ചെയ്തു.
